تجربة ساره مع كامبلي خلال ٣ أسابيع!

السلام عليكم و رحمة الله و بركاته

معكم ساره، اليوم بتكلم لكم عن تجربتي مع تطبيق كامبلي : 

بالبداية بتكلم عن نفسي و مستواي باللغة، أنا دارسة انجليزي بالجامعة لكن كنا بس ناخذ الاساسيات يعني من ناحية قواعد، كلمات، تاريخ اللغة كلها تمام معي لكن مشكلتي كانت المحادثة! 

ما كنا نمارس اللغة أبداً و هذي كانت مشكلة بالنسبة لي و كنت أعاني منها. فقررت أشترك فيه عشان أطور من لغتي. بنفس الوقت أضيع وقت فيه دام إن حنا بالإجازه و طبعاً فيه أكثر من شخص حمسني له، سجلت فيه اشتراك لمدة 3 شهور 3 ايام في الأسبوع 30 دقيقة في اليوم.  

اخترت 3 ايام بالأسبوع عشان ما أحس بضغط و ما اتوهق بالأيام الباقية فأشوف 3 ايام مره حلو و تقدر تزيد الايام مع زيادة السعر.

تجربتي معه خذت لي 3 اسابيع مع كامبلي، بس 3 اسابيع و أحس استفدت منه مرره يعني حبيت حبيت ما توقعت بيكون كذا!

 المعلمين اللي فيه لطييييفين لطيفين مره، يعني الحمدلله من بديت لما اليوم كل المعلم  اللي كلمتهم ما شفت منهم إلا الخير و الفايدة و المتعة ♥️.  

– يحاولون يساعدونك. 

– يعدلون أخطائك بأسلوب لطيف.

– نفسيتهم تهبل. 

باختصار يعني تدخل و أنت مستانس و تطلع و أنت مستانس. 

يعني مثلاً اللي كلمتهم أنا اول شي يقولون لي تكلمي عن نفسك فأعرّف عن نفسي بشكل مبسط و بعدها يسألوني عن هواياتي و من هواياتي تطلع السوالف.

• الأسابيع والمواضيع:   

الأسبوع الأول/ 

كان غالباً مثل ما ذكرت فوق تعريف عن نفسي، بعدها يسألوني عن هواياتي و من هواياتي تطلع سوالف و ضحك و أنا اسأل و هي تسأل. تمر الـ۳۰ دقيقه بسرعة ولا ودي تخلص. 

الأسبوع الثاني /

المعلمين بدأو يرسلون لي مواضيع و يقولون لي اختاري منها و نبدا نتكلم عنها، حلو هذا مره حبيته، فيه كلمات جديده ما قد مرت علي مع تعريف بسيط. و هي تخليني اقرأ و تشوف نطقي صحيح وإلا تعدل لي و تفهّمني المعنى يعني حلو حلو مرره للي يبي يتعلم.

الأسبوع الثالث /

 المعلمين صاروا يرسلون لي روابط فيها اسئلة، و نختار كم سؤال و اقراه و نبدأ نناقشه. ونفس الشي تروح الـ۳۰ دقيقة سرييع ولا ودي تخلص ♥️.  

طبعًا مع بداية كل مكالمة هي/هو يسألك وش حابه نسوي اليوم؟ 

– محادثة؟ 

– اسئلة؟ 

– عندك شي تبيني اشرحه لك؟ 

– فيه موضوع معين تبين نتناقش فيه؟ 

و أنت تختار وش حاب تتكلم عنه.

• المعلمين المفضلين:

 بعد ما جربت أكثر من معلمة فيه معلمين محددين ارتحت معهم و حبيت السوالف معهم. طبعاً كل اللي كنت اختارهم كانوا اناث عشان أخذ راحتي معهم أكثر، منهم: 

 | Lee A | 

هذي وحده كبيره بالسن رائعة مره و ترسل بنهاية الاتصال كل شي لك سواء كان صح أو لا. و تصحح لك أول بأول.

| Aitza RI |

هذي رائعة و تحب السوالف و كل شي تسأل عنه و تخليك تتكلمين و تقيم لغتك إذا كنت حاب. و تحب تتكلم عن نفسها و لطييفه مرره.

| Jenny zaki | 

هذي بعد رائعة و لكنتها رااائعة و تفتح النفس و سوالفها حلوة. وإذا تبي أي شي عن اختبار الايلتس أو غيره من الاختبارات بتفيدك.

| Tanya Skovorodina | 

هذي بعد راائعة و صغيره بعمري تقريبًا. تحب تسولف عن الحيوانات الأليفة و بتوريك صور لها مع قطوتها، وتساعد بأي شي تبي تتعلمه.

فيه معلمين أكثر و أكثر حلويين و يفتحون النفس اللي تشوفه متصل ادخل و سولف معه! 

و بالنهاية، أتمنى انكم استفدتوا من تجربتي، لو كنتوا حابيين تشتركون بس انكم مترددين.. أنصحكم فيه قبل لا تخلص الاجازة شي حلو ولا فيه انك تستحي أو تتفشل بالعكس واضح انهم متعودين على الناس اللي ببدايتهم و يحاولون يساعدون قد ما يقدرون.